Home > Papiamentu > Notisia > Rapòrt efektividat Ombudsman

Rapòrt efektividat Ombudsman

Ombudsman di Kòrsou a organisá dia 17 di yanüari último, un seshon di informashon den kua profeshonalnan di EY a presentá e resultado di e rapòrt ku nan a skibí tokante e efektividat di e instituto di Ombudsman. Ombudsman a hasi entrega di un kopia di e raport aki tantu na Prome Minister, sr. Eugene Rhuggennaath, komo na Vise-presidente di Parlamento, sr. Eugene Cleopa.

Den su introdukshon Ombudsman a indiká ku e motibu prinsipal pa a laga hasi e investigashon aki, tabata pa por a haña un bista realístiko kon den práktika e rekomendashonnan di e instituto lo por haña mas atenshon di parti di gobièrnu. Den e kuadro aki Ombudsman a laga hasi un análisis krítiko di su propio instituto, pero a duna gobièrnu tambe e oportunidat pa por a partisipá aktívamente i duna un kontribushon na e investigashon hasí dor di EY. Den e kuadro aki por papia di un investigashon i un rapòrt históriko.

Banda di a wak e sífranan den e relátonan anual ku Ombudsman a entregá na Parlamento di Kòrsou durante di e periodo 2015 – 2018, EY a hiba tambe diferente kombersashon ku varios mandatario i empleádonan públiko. E konklushon prinsipal tabata ku tin espasio pa drecha e manera ku gobièrnu ta atendé ku e rekomendashonnan di Ombudsman. 

EY a hasi diferente rekomendashon tantu na Ombudsman komo na gobièrnu. EY a rekomendá gobièrnu, por ehèmpel, pa establesé un prosedura di keho formal ku lo mester konta pa tur ministerio. Den e kuadro aki EY a konsehá gobièrnu tambe pa apuntá sufisiente empleádonan públiko ku tin e konosementu pa por ehekutá un prosedura di keho di un forma adekuá. Otro punto di atenshon ku EY a señalá ta ku gobièrnu mester optimalisá e komunikashon interno den e ministerionan, di manera ku un funshonario públiko ku ta atendé ku keho, por haña e espasio pa di un manera struktual suminstrá e mandatario responsabel ku informashon relevante tokante e proseso di keho.

Pa loke ta trata e rekomendashonnan den direkshon di Ombudsman, EY a indiká prinsipálmente ku e instituto mester ta mas visibel tantu pa gobièrnu mes komo pa e siudadano. Un manera pa logra esaki, ta pa ta mas visibel den médionan di komunikashon tradishonal i sosial.

Ombudsman di Kòrsou ta kere ku e rapòrt aki ta kontené eleméntonan i rekomendashonnan balioso ku por hiba na un mehorashon di e situashon aktual. Teniendo kuenta entre otro ku e remárkenan krítiko i e pregúntanan ku a bini dilanti durante di e seshon di informashon ku a tuma lugá, Ombudsman ta wak bèk riba un mainta súmamente fruktífero ku na final lo benefisiá prinsipálmente e siudadano ku diáriamente ta aserk’é buskando un solushon. E rapòrt integral ta disponibel riba website di e instituto di Ombudsman [www.ombudsman-curacao.cw].

Entrega keho

Tur hende tin derechi di hasi un petishon na Ombudsman pa hasi un investigashon riba e manera ku un organo gubernamental komporta su mes den sierto situashon ku un siudadano of persona di legal.


Formulario di keho

Orario di ofisina

Nos ora nan di ofisina ta di djaluna te ku djabierne.

Inloop: 08.30 - 11.30

Sita: 14.00 - 15.30

Ruta