Minister di Finansa pa medio di e karta di Duana a splika mas alew, entre otro, ku e punto di salida ku no ta akseptá sèn “cash” mas komo pago na Duana, ta konforme lei i ku den seshonnan di informashon kaminda Duana a komuniká su intenshonnan na su klientenan, e klientenan no tabata tin problema ku e kambio di forma di pago.
Ombudsman den su reakshon di dia 16 mei 2017, a bolbe splika di un manera ekstenso ku un liña di maneho kaminda ku ta deskartá pago “cash” por kompleto pa servisionan públiko di gobièrnu, no ta kuadra ku normanan di bon gobernashon i no ta kuadra ku e leinan vigente di pais. Pa e motibu aki Ombudsman a pidi Minister di Finansa pa rekonsiderá su desishon i hasi posibel ku di un manera òf otro por hasi pagonan “cash” na Duana posibel.
