Home > Papiamentu > Notisia > Entrega Relato Anual 2021

Entrega Relato Anual 2021

Dia 27 di yüni 2022 Ombudsman di Kòrsou, Keursly Concincion, a hasi entrega di su relato di aña 2021 na Presidente di Parlamento di Kòrsou, señora Charetti America-Francisca. Ku entrega di e relato aki, Ombudsman a informá Parlamento den liñanan general tokante e trabounan ku e instituto a hasi den aña 2021, i a responsabilisá tambe uso di e presupuesto risibí den e aña ei.

Den aña 2021 Ombudsman a risibí un total di 785 kaso. E gran mayoría di kasonan aki tabata tin di haber ku e echo siudadanonan no a risibí kontesta riba nan kartanan i/òf petishonnan. Pa medio di intervenshon ofisial, pero informal, mayoría di e kasonan aki a keda solushoná den 2021 mes.

E tres ministerionan ku Ombudsman a risibٌí mas tantu kaso tokante di nan tabata:

  • Ministerio di Tráfiko, Transporte i Planifikashon Urbano                                                   [73]
  • Ministerio di Desaroyo Sosial, Labor i Bienestar                                                                  [66]
  • Ministerio di Hustisia                                                                                                                 [66]

Den e relato di aña 2021 Ombudsman ta para ketu na diferente desaroyo, por ehèmpel na e echo ku rapòrtnan di e instituto ainda no ta keda tumá sufisientemente na serio dor di gobièrnu. Esaki tabata evidente atrobe den aña 2021, mirando  e echo ku gobièrnu te ainda no a reakshoná riba niun di e 53 rapòrtnan ku a keda skibí den aña ei dor di e instituto. Pa ilustrá sinembargo ku e komportashon aki no ta unu nobo, Ombudsman a para ketu atrobe den su relato di 2021 na e rapòrt ku a keda skibí na aña 2016, tokante e konsekuensianan di introdukshon di e proyekto di Community Mailboxes, i riba kua te ku awe no a bin un kontesta, apesar ku gobièrnu a sigui implementá e proyekto aki.

Mas aleu Ombudsman a splika den su relato anual ku ainda no por kuminsá ku búskeda i selekshon di kandidatonan pa e funshon di Ombudsman pa Mucha, ya komo ku ainda e kondishonnan laboral sekundario mará na e funshon aki no ta reglá. E desaroyo aki naturalmente tin konsekuensianan pa derechinan di hobennan i muchanan den nos komunidat. 

Finalmente Ombudsman a informá Presidente di Parlamento di Kòrsou tokante dos proyekto di lei ku e instituto ta trahando riba dje, despues ku e instituto a hiba un diálogo konstruktivo ku gobièrnu di Kòrsou tokante e nesesidat pa e proyektonan aki keda realisá. E promé proyekto di lei tin komo meta pa garantisá e derechi humano riba awa limpi, i e di dos proyekto lo bai regla e manera ku gobièrnu ta atende ku su propio kehonan promé ku esakinan yega serka Ombudsman. Ambos proyekto di lei lo keda entregá den aña 2022 na gobièrnu.

E relato anual di 2021 di Ombudsman ta disponibel di forma integral aki.

Entrega keho

Tur hende tin derechi di hasi un petishon na Ombudsman pa hasi un investigashon riba e manera ku un organo gubernamental komporta su mes den sierto situashon ku un siudadano of persona di legal.


Formulario di keho

Den media

Programa informativo Ombudsman 2020

Episodio 4 - Transparensha di Gobernashon

(Transmishon 3 novèmber 2020)

Mas detaye

Orario di ofisina

Nos ora nan di ofisina ta di djaluna te ku djabierne.

Inloop: 08.30 - 11.30

Sita: 14.00 - 15.30

Ruta